هوويس الشعر العربي ..هشام الجخ

والصلاه والسلام علي سيد المرسلين ورحمه الله للعالمين

نبينا محمد وعلي اله وصحبه ومن تبعه باحسان الي يوم الدين


امــــــــــــــــــــــــا بــــ؛عــــــــ؛د.....؛


طبعا زي ما باين من العنوان الموضوع عن شخصيه بجد ساحره

من اجمل الشخصيات الي حسيت كلامها في يوم الايام
بقالي فتره مش قليله بعتبر ان مفيش شعراء اليومين دول بالنسبه للكلام التقيل بتاع زمان

لكن فعلا مسابقه امير الشعراء بينت ناس تمام جداااا
زي تميم البرغوثي مثلا


وزي الشخصيه الجميله الي في موضوعنا


انا لما دورت ما لقش احسن من كلامه علشان اعرفه بيه
.....................


اللحظة دي صعبة جدا
لما يطلبوا منك باصرار انك تكتب تعريف للناس عنك وعن حياتك
خلينا نحاول
انا هشام الجخ
اصلا من قنا .. مركز ابو تشت..ومسقط رأسي سوهاج وخوالي كمان من سوهاج
درست واتربيت في سوهاج لغاية ما دخلت كلية التجارة هناك
حولت من تجارة سوهاج لتجارة عين شمس واتخرجت في جامعة عين شمس سنة 2003
اتعينت مشرف على المركز الثقافي في جامعة عين شمس في نفس سنة التخرج وعملت دراسات عليا في ادارة الاعمال في نفس الجامعة
زمايلي وانا اسسنا المركز الثقافي في الجامعة وكانت فترة نهاية التسعينات وبداية الالفية الجديدة - بفضل الله - عصر مشهود له في تاريخ جامعة عين شمس ادبيا
استقلت من الوظيفة بالجامعة سنة 2009 لاني باختصار معرفتش اعيش حياة الموظفين التقليدية ده غير ان البيروقراطية وقتها كانت شيء قاتل لكل الانشطة الطلابية ولكل مناحي الابداع
اهتميت بمشروعي اللي بقالي 15 سنة بحلم بيه وهو زيادة شعبية الشعر في مصر واعادة الشعر على السنة الشباب والاطفال

في السكة بقى حصلت حاجات كتير طبعا
حصلت على احسن شاعر عامية من اتحاد الكتاب سنة 2008
حصلت على شوية مراكز في الشعر الفصيح والعامي ايام الجامعة
يعني .. مش ده المهم
المهم اني بحب الشعر جدا .. وبذاكره .. وبكتبه على مهلي جدا جدا جدا
ومش بقول شعري لحد غير لما اكون انا قريته 40 مرة وعجبني تماما

بحب اسمع مزيكا هادية جدا
لكن ساعات بتلاقيني قلبت وشغلت مزيكا صاخبة وقمت ارقص
باستمتع قوي قوي قوي بالرقص الصعيدي والنوبي والسمسية

اهلاوي وبحترم جمهور الزمالك وكنت بالعب باك يمين في فريق سوهاج ايام 4-2-4 لما كان فيه حاجة اسمها باك وحاجة اسمها وينج

اتجوزت سنة 2004 وربنا افاض عليا بزوجة صالحة وبنتين زي القمر
مواليد اول اكتوبر ..يعني برج الميزان
رغم اني كنت ابن والدتي الوحيد - رحمها الله - لكن ما اظنش اني عشت كولد مدلل .. يمكن لان والدتي - رحمها الله - كانت سيدة تربوية بحكم عملها كرئيس قطاع تعليمي بسوهاج ويمكن لان ابويا لم يكن يفرق في المعاملة بين ابنائه ونسائه فخرجنا جميعا متساويين في المعاملة والتربية

لما جيت القاهرة جديد كنت لسة في الجامعة اشتغلت في مجال التصميمات والجرافيك والطباعة .. تركت المجال لكني مازلت - حتى وقتنا هذا - لما باعدي على جسر السويس لازم ادخل عين شمس واسلم على صحاب المطابع والصنايعية اصدقائي

باحترم الناس جدا
واي حد بيعمل معايا موقف وحش باحط نفسي مكانه وافكر باسلوبه واحاول اتعامل مع الموقف من وجهة نظره

امتع لحظاتي لما اقف على المسرح واشوف عيون الناس بتلمع وهي بتسمع شعر
واتعس لحظاتي لما حد ميعرفنيش يتهمني بالغرور
غرور على خيبة ايه مش عارف؟؟تقولش الواد حليوة قوي؟؟؟

بكره نظام حسني مبارك جدا جدا جدا وشفت بعيني الناس اللي اتحرقت في قطر الصعيد وهي حية.. ولو النظام اللي بعده كان زيه او حتى شبهه يبقى مكتوب على هشام الجخ تفضل قصايده ممنوعة - اقصد القصايد المهمة طبعا

بحلم بالمساواة
مسلم ومسيحي وصعيدي وبحراوي وغني وفقير
نفسي الشباب اللي في سني يلقوا شقق يتجوزوا فيها ويلقوا وقت يقروا ويتثقفوا ويفكروا .. ونفسي جدااااااااااااااااا اصلي في المسجد الاقصى
تحياتي لحضراتكم جميعا

الحساب الشخصي الوحيد بتاعي على الفيس هو ده
https://www.facebook.com/profile.php?id=717061330
والفانبيدج الوحيدة بتاعتي على الفيس هو ده
https://www.facebook.com/pages/%D8%A7...1164037?ref=ts
والموقع الرسمي الوحيد الخاص ليا هو ده
www.algakh.com ()

...................
ده كان كلامه عالفيس بوك
ومش لاقي كلام اقوله بعده

لكن هنزله قصايد القــــاء وكلمات

وياريت اسمع تعليقاتكم علي القصايد ونناقشها واكتر مقاطع اعجبتكم

متجدد دائما